Молитва праведному Иоанну Русскому, исповеднику

  • Тропарь, глас 4
  • Кондак, глас 8
  • Молитва

Тропарь, глас 4

От земли́ плене́ния твоего́ воззва́вый тя к Небе́сным селе́нием, Госпо́дь соблюда́ет невреди́мо и цельбоно́сно те́ло твое́, пра́ведне Иоа́нне, ты бо, в Росси́и я́тый и во Аси́ю прода́нный, посреде́, ага́рянскаго злоче́стия благоче́стно пожи́л еси́ во мно́зе терпе́нии и, се́яв зде слеза́ми, жне́ши та́мо неизглаго́ланною ра́достию. Те́мже моли́ Христа́ Бо́га спасти́ся душа́м на́шим.

Кондак, глас 8

В честне́й па́мяти твое́й, свя́те, весели́тся о тебе́ Росси́я, во благоче́стии тя воспита́вшая, и целе́бным моще́м твои́м ра́дуется Аси́я, иде́же у́зкий путь проше́д страда́льческаго пле́на и по́стнических подвиго́в, сосу́д че́стен яви́лся еси́ Бо́жия благода́ти, ея́же проси́ и нам, чти́телем твои́м, да зове́м ти: ра́дуйся, Иоа́нне, благода́ти тезоимени́те.

Молитва

О, святы́й новоявле́нный уго́дниче Бо́жий Иоа́нне Ру́сский! По́двигом до́брым подвиза́яся на земли́, восприя́л еси́ на Небесе́х вене́ц пра́вды, е́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́й Престо́лу Бо́жию, приими́ моле́ния на́ша, раб Бо́жиих (имена), и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́зней диа́вольских, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.