- Богородице Дево, радуйся
- Достойно есть
- Царице моя Преблагая
- Кондак Пресвятой Богородице
- Кондак Взбранной Воеводе
- Песнь Богородицы
- О, Всепетая Мати
- О Тебе радуется
- О, преславнаго чудесе
- Ангел вопияше
- Песнь хвалебная Пресвятой Богородице
- Молитвы Пресвятой Богородице покаянные
- Молитва 1‑я
- Молитва 2‑я, прп. Александра Свирского
- Молитва 3‑я, прп. Ефрема Сирина
- Молитва 4‑я, прп. Нила Сорского, чтомая в день воскресный
- Молитвы Пресвятой Богородице просительные
- Молитва 1‑я
- Молитва 2‑я
- Молитвенное воззвание св. Иоанна Кронштадтского
Богородице Дево, радуйся
Богоро́дице Де́во, ра́дуйся, благода́тная Мари́е, Госпо́дь с Тобо́ю, Благослове́нна Ты в жена́х и благослове́н Плод чре́ва Твоего́, я́ко Спа́са родила́ еси́ душ на́ших.
Достойно есть
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Царице моя Преблагая
Цари́це моя́ Преблага́я, Наде́ждо моя́, Богоро́дице, Прия́телище си́рых и стра́нных Предста́тельнице, скорбя́щих Ра́досте, оби́димых Покрови́тельнице!
Зри́ши мою́ беду́, зри́ши мою́ скорбь; помози́ ми, я́ко не́мощну, окорми́ мя, я́ко стра́нна! Оби́ду мою́ ве́си, разреши́ ту, я́ко во́лиши: яко не и́мам ины́я по́мощи, ра́зве Тебе́, ни ины́я Предста́тельницы, ни благи́я Уте́шительницы, то́кмо Тебе́, о Богома́ти! Я́ко да сохрани́ши мя и покры́еши во ве́ки веко́в. Ами́нь.
Кондак Пресвятой Богородице
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты нам помози́, на Тебе́ наде́емся, и Тобо́ю хва́лимся. Твои́ бо есмы́ раби́, да не постыди́мся.
Кондак Взбранной Воеводе
Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́ Богоро́дице: но я́ко иму́щая держа́ву непобеди́мую, от вся́ких нас бед свободи́, да зове́м Ти: Ра́дуйся Неве́сто Неневе́стная.
Песнь Богородицы
Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.
Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.
Честне́йшую херуви́м…
Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.
Честне́йшую херуви́м…
Сотвори́ держа́ву мы́шцею Свое́ю, расточи́ го́рдыя мы́слию се́рдца их.
Честне́йшую херуви́м…
Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.
Честне́йшую херуви́м…
Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.
Честне́йшую херуви́м…
О, Всепетая Мати
О, Всепе́тая Ма́ти, ро́ждшая всех святы́х Святе́йшее Сло́во! Ны́нешнее прие́мши приноше́ние, от вся́кия изба́ви напа́сти всех, и бу́дущия изми́ му́ки, о Тебе́ вопию́щих: Аллилу́иа.
О Тебе радуется
О Тебе́ ра́дуется, Благода́тная, вся́кая тварь, А́нгельский собо́р и челове́ческий род, освяще́нный хра́ме и раю́ слове́сный, де́вственная похвало́, из нея́же Бог воплоти́ся и Младе́нец бысть, пре́жде век Сый Бог наш. Ложесна́ бо Твоя́ престо́л сотвори́. И чре́во Твое́ простра́ннее небе́с соде́ла. О Тебе́ ра́дуется, Благода́тная, вся́кая тварь, сла́ва тебе́.
О, преславнаго чудесе
О, пресла́внаго чудесе́! Небесе́ и земли́ Цари́ца, от святы́х сро́дников на́ших умоля́емая, до ны́не зе́млю Ру́сскую покрыва́ет и ли́ка Своего́ изображе́нии ми́лостивно обогаща́ет. О Влады́чице Держа́вная! Не преста́ни и на бу́дущее вре́мя во утвержде́ние на Руси́ правосла́вия ми́лости и чудеса́ излива́ти до ве́ка. Ами́нь.
Ангел вопияше
А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба, и ме́ртвыя воздви́гнувый: лю́дие, весели́теся. Свети́ся, свети́ся, но́вый Иерусали́ме, сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.
Песнь хвалебная Пресвятой Богородице
Тя́, Ма́терь Бо́жию, хва́лим, Тя́, Мари́ю Присноде́ву и Богоро́дицу, испове́дуем, Тя́, от Преве́чнаго Отца́ избра́нную, вся́ земля́ велича́ет; Тебе́ вси́ А́нгели и Арха́нгели, Тебе́ вси́ Нача́ла смире́нно слу́жат; Тебе́ вси́ Вла́сти и превы́шния Си́лы небе́сныя, и вся́ Госпо́дствия повину́ются; Тебе́ вси́ Престо́ли, Тебе́ Херуви́ми и Серафи́ми ра́дующеся предстоя́т, Тебе́ вси́ а́нгельския ли́ки непреста́нным гла́сом вопию́т: Пресвята́я Богоро́дице Мари́е, Ма́ти Присноде́во! по́лны су́ть небеса́ и земля́ вели́чества сла́вы чре́ва Твоего́; Тебе́ пресла́вный апо́стольский ли́к своего́ Творца́ и Спаси́теля Ма́терь восхваля́ют; Тебе́ му́чеников мно́жество Богоро́дицу велича́ют; Тебе́ пресла́вный испове́дников ли́к Святы́я Тро́ицы хра́м нарица́ют; Тебе́ де́вственнии полцы́ своего́ де́вства о́браз пропове́дуют; Тебе́ вси́ святы́х ду́ши пресла́вную Цари́цу Небе́с нарица́ют; Тебе́ по все́й вселе́нней свята́я Це́рковь все́х ве́рных христиа́н испове́дует Ма́терь Бо́жию и почита́ет и́стиннаго Царя́ Небе́снаго Богоизбра́нную Отрокови́цу; Ты́ А́нгелов Госпоже́ и все́х святы́х сла́ва; Ты́ ра́йская отве́рстая две́рь; Ты́ ле́ствице Ца́рствия Небе́снаго; Ты́ Царя́ сла́вы прекра́сный черто́же; Ты́ неистле́нный ковче́же благода́ти; Ты́ бе́здна щедро́т; Ты́ прибе́жище гре́шных; Ты́, благослове́нная Ма́ти Спаси́теля Христа́; Ты́, ра́ди освобожде́ния плене́ннаго челове́ка, Бо́га восприя́ла еси́ во чре́во от Ду́ха Свята́го и Невмести́маго вмести́ла еси́; Тобо́ю попра́н бы́сть а́дский вра́г и отверзо́шася ве́рным две́ри Ца́рствия Небе́снаго; Ты́ одесну́ю Бо́га стои́ши; Ты́ Его́ умоля́еши за на́с, Присноде́во Мари́е, И́же бу́дет суди́ти живы́х и ме́ртвых; Тя́ у́бо жела́ем всегда́ бы́ти на́шу Засту́пницу к возлю́бленному Сы́ну Твоему́ и Бо́гу, И́же честно́ю кро́вию на́с искупи́л е́сть, да восприи́мем ве́чныя сла́вы обетова́ние. Спаси́ лю́ди Твоя́, о, Влады́чице, и благослови́ достоя́ние Твое́, я́ко да бу́дем прича́стницы блаже́ннаго насле́дия Сы́на Твоего́, и упаси́ на́с, и возьми́ на́с да́же до ве́ка, на вся́к де́нь. О, Преще́драя! хвали́ти и блажи́ти Тя́ жела́ем се́рдцем и устна́ми. Сподо́би, Премилосе́рдая Ма́ти, ны́не и всегда́ без греха́ сохрани́тися на́м. Поми́луй на́с, Засту́пнице, поми́луй на́с, да бу́дет ми́лость Твоя́ с на́ми, я́ко упова́ем на Тя́, соблюди́ на́с, Премилосе́рдая, во ве́ки веко́в. Тебе́ подоба́ет хвала́, Тебе́ подоба́ет сла́ва, Тебе́ подоба́ет пе́ние ны́не и при́сно, и во ве́ки веко́в, ами́нь.
Молитвы Пресвятой Богородице покаянные
Молитва 1‑я
Нескве́рная, небла́зная, нетле́нная, Пречи́стая, Неневе́стная Богоневе́сто, Богоро́дице Мари́е, Присноде́во, Госпоже́ ми́ра и наде́ждо моя́! При́зри на мя́, гре́шнаго, в ча́с се́й и его́же из чи́стых крове́й Твои́х неискусому́жно родила́ еси́, Го́спода Иису́са Христа́, ми́лостива мне́ соде́лай ма́терними Твои́ми моли́твами; Того́ зре́вшая осужде́нна и ору́жием печа́ли в се́рдце уязви́вшися, уязви́ ду́шу мою́ Боже́ственною любо́вию; Того́ во у́зах и поруга́ниях го́рце оплакавшая, сле́зы сокруше́ния мне́ да́руй; при во́льном Того́ ве́дении на сме́рть душе́ю тя́жце поболевшая, боле́зней мя́ свободи́, да Тя́ сла́влю, досто́йно сла́вимую во вся́ ве́ки. Ами́нь.
Молитва 2‑я, прп. Александра Свирского
Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший. Вонми́ гла́су моле́ния моего́ и вопль мой и стена́ние услы́ши. Я́ко беззако́ния моя́ превзыдо́ша главу́ мою́ и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго. Поми́луй мя, ка́ющагося в злых де́лех мои́х, и обрати́ на путь пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м ны́не, и при́сно, и во ве́ки веко́в. Ами́нь.
Молитва 3‑я, прп. Ефрема Сирина
Дева Владычица Богородица, благодатная Богородительница, преблагословенная Богородительница, Преблагословенная, Богоблагодатная, вместилище Божества Единородного Сына бессмертного и невидимого Отца, приклони ухо Твое и выслушай слова мои, произносимые скверными и нечистыми устами моими. Ибо вот, с сокрушенною душою и смиренным умом притек я к благоутробию Твоему. Не презри меня, бедного, не попусти до конца погибнуть мне, недостойному рабу Твоему, но употреби Матерния Твои молитвы, исцели окаянную мою душу, немилосердо сокрушенную лукавыми моими страстями. Злой враг, сокрушив ее грехами сластолюбия, попрал во прах. Потому исполнен я всякого стыда, не смею и лица не имею, чтобы у человеколюбивого Бога моего просить прощения во множестве грехов и уврачевания неисцельных язв моих. Ибо осквернил я храм телесный, непристойными своими пожеланиями внес в него множество нечистот и все чувства повредил непозволительными делами. Поэтому не имею дерзновения воздеть к небу руки, оскверненные худыми занятиями. И на молитву отверз я уста, оскверненные злословием и клеветами на ближнего. Посему, пред Твоими неизреченными щедротами, Всенепорочная Владычица, повергаюсь я, бедный и блудный. Ибо нет у меня иного упования, или прибежища, кроме Тебя, единственного моего утешения и скорой защиты, – Тебя, радование души моей, освобождение от печали, искупление из плена, обожение смертных, наше очистилище и прибежище, востание падших, воссоздание души моей и тела, искупление грехов моих, источаемое Богом, орошение иссохшего сердца моего, лучезарный светильник омраченной души моей, прикровение наготы моей, прекращение воздыханий моих, пременение судеб моих. На Тебя уповаю, Тобой хвалюсь; не лишай нас предстательства Твоего, но всегда помогай, покровительствуй и не оставляй нас. Приятны прошения Твои Единородному Сыну Твоему. Ибо Благоволивший быть причтенным к рабам кольми паче сохранит постановление Свое и милость к Тебе, послужившей Ему неизреченным рождением? Потому и радуется Он ходатайствам Твоим и, почитая славу Твою Своею собственной, по долгу исполняет прошения Твои. Ты не презри только меня, беднейшего, и непристойность дел моих да не пресечет безмерной милости Твоей, Богородица, превожделенное для меня имя, ибо ничто не может быть крепче помощи Твоей. Посему, пренеукоризненная Ходатайница мира, повинный во многих грехопадениях с покаянием припадаю к Тебе, скорой в нуждах Помощнице, по Боге Защитнице, надежному и сильному о мне предстательству, и из глубины сердца взываю: помилуй меня, исполненного всяким зловонием и леностью, о Благолюбивая и Благоутробная, и приими сие жалкое мое и ничтожное прошение. И хотя лениво и нерадиво приношу Тебе оное, однако же, Твоими Матерними молитвами соделай благоприятным Сыну Твоему и Богу, Небесного Царствия сподобив, меня, хвалящего и благословляющего Отца, и Сына, и Святаго Духа, ныне и всегда, и во веки веков. Аминь.
Молитва 4‑я, прп. Нила Сорского, чтомая в день воскресный
О, всеми́лостивая Де́во Богоро́дице, Ма́ти щедро́т и человеколю́бия, прелюбе́зная наде́жде и упова́ние мое́!
О, Ма́ти пресла́дкаго, перворожде́ннаго и вся́ку любо́вь превосходя́щаго Спаси́теля, Го́спода Иису́са Христа́, Человеколю́бца и Бо́га моего́. Све́те помраче́нныя души́ моея́!
К Тебе́ а́з многогре́шный и безнадежный припа́даю и Тебе́ молю́ся, Исто́чниче милосе́рдия, Де́во Мари́е, бе́здну милосе́рдия и пучи́ну щедро́т и человеколю́бия ро́ждшая: поми́луй мя́, вопию́ Ти́ боле́зненно, поми́луй мя́, всего́ уя́звленнаго, в лютые разбо́йники впа́дшаго, и от оде́жды, в ню́же облече́ мя́ Оте́ц, увы́ мне́, обнаже́ннаго. Те́мже возсмерде́ша и согни́ша ра́ны моя́ от лица́ безу́мия моего́.
Но, Влады́чице моя́ Богоро́дице, молю́ Тя́ смире́нно, воззри́ на мя́ ми́лостивым свои́м о́ком и не возгнуша́йся мене́, всего́ помраче́ннаго, всего́ оскверне́ннаго, всего́ в ти́не сласте́й и страсте́й погруже́ннаго, лю́те па́дшаго и возста́ти не могу́щаго: умилосе́рдися на мя́ и да́ждь ми́ ру́ку по́мощи, во е́же воздви́гнути мя́ из глубины́ грехо́вныя.
О Ра́досте моя́! Изба́ви мя́ от обыше́дших мя́; просвети́ лице́ Твое́ на раба́ Твоего́, спаси́ погиба́ющаго, очи́сти оскверне́ннаго, возста́ви па́дшаго лю́те: мо́жеши бо вся́, я́ко Ма́ти Бо́га Всемогу́щаго.
Изле́й на мя́ еле́й милосе́рдия Твоего́, и вино́ умиле́ния точи́ти ми́ пода́ждь: Тебе́ бо вои́стину еди́ну наде́жду стяжа́х в житии́ мое́м.
Не отри́ни у́бо мене́, к Тебе́ притека́ющаго но ви́ждь ско́рбь мою́, Де́во, и души́ жела́ние, и сие́ приими́ и спаси́ мя́, Хода́таице спасе́ния моего́. Ами́нь.
Молитвы Пресвятой Богородице просительные
Молитва 1‑я
К кому́ возопию́, Влады́чице? К кому́ прибе́гну в го́рести мое́й, а́ще не к Тебе́, Цари́це Небе́сная? Кто́ пла́ч мо́й и воздыха́ние мое́ прии́мет, а́ще не Ты́, Пренепоро́чная, Наде́ждо христиа́н и Прибе́жище на́м гре́шным? Кто́ па́че Тебе́ в напа́стех защити́т? Услы́ши у́бо стена́ние мое́, и приклони́ у́хо Твое́ ко мне́, Влады́чице Ма́ти Бо́га моего́, и не пре́зри мене́, тре́бующаго Твоея́ по́мощи, и не отри́ни мене́ гре́шнаго. Вразуми́ и научи́ мя́, Цари́це Небе́сная; не отступи́ от мене́, раба́ Твоего́, Влады́чице, за ропта́ние мое́, но бу́ди мне́ Ма́ти и Засту́пница. Вруча́ю себе́ ми́лостивому покро́ву Твоему́: приведи́ мя́ гре́шнаго к ти́хой и безмяте́жней жи́зни, да пла́чуся о гресе́х мои́х. К кому́ бо прибе́гну пови́нный а́з, а́ще не к Тебе́, упова́нию и прибе́жищу гре́шных, наде́ждою на неизрече́нную ми́лость Твою́ и щедро́ты Твоя́ окриля́емь? О, Влады́чице Цари́це Небе́сная! Ты́ мне́ упова́ние и прибе́жище, покро́в и заступле́ние и по́мощь. Цари́це моя́ преблага́я и ско́рая Засту́пнице! Покры́й Твои́м хода́тайством моя́ прегреше́ния, защити́ мене́ от вра́г ви́димых и неви́димых, умягчи́ сердца́ злы́х челове́к, возстаю́щих на мя́. О, Ма́ти Го́спода моего́ Творца́! Ты́ еси́ ко́рень де́вства и неувяда́емый цве́т чистоты́. О, Богороди́тельнице! Ты́ пода́ждь ми́ по́мощь немощству́ющему плотски́ми страстьми́ и боле́знующему се́рдцем: еди́но бо Твое́ и с Тобо́ю Твоего́ Сы́на и Бо́га на́шего и́мам заступле́ние, и Твои́м пречу́дным заступле́нием да изба́влюся от вся́кия беды́ и напа́сти, о пренепоро́чная и пресла́вная Бо́жия Ма́ти Мари́е. Те́мже со упова́нием глаго́лю и вопию́: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, Госпо́дь с Тобо́ю.
Молитва 2‑я
О, Пресвята́я Де́во, Ма́ти Го́спода Вы́шняго, всеми́лостивая Засту́пнице и Покрови́тельнице все́х, к Тебе́ с ве́рою прибега́ющих! При́зри с высоты́ небе́сныя сла́вы Своея́ на мя́, припа́дающаго к подно́жию Твоему́, услы́ши смире́нную моли́тву мене́, гре́шнаго и недосто́йнаго раба́ Твоего́, и принеси́ ю́ пред возлю́бленнаго Сы́на Своего́. О, Преблагослове́нная Богоро́дице! Ты́, имену́емая все́х скоропослу́шница и скорбя́щих ра́досте, услы́ши и мене́ ско́рбнаго; Ты́ – утоле́ние печа́ли, утоли́ и моя́ душе́вныя боле́зни и печа́ли; Ты́ – купино́ неопали́мая, сохрани́ ми́р и все́х на́с от вредоно́сных о́гненных стре́л вра́жиих; Ты́ – взыска́ние поги́бших, не попусти́ мене́ поги́бнути в бе́здне грехо́в мои́х; Ты́ цели́тельница стра́ждущих, исцели́ и мене́, уя́звленнаго от не́мощей душе́вных и теле́сных; Ты́ – неча́янная ра́досте, ра́достию спасе́ния Твоего́ оте́мли от мене́ стра́х гряду́щаго муче́ния; Ты́ – спору́чница гре́шных, бу́ди и мне́, гре́шнику, благосе́рдою спору́чницею покая́ния и спасе́ния моего́. На Тебе́ по Бо́зе все́ мое́ упова́ние возлага́ю, бу́ди ми́ вы́ну неусы́пная хода́таица и всеси́льная предста́тельница пред Сы́ном Твои́м, Го́сподом на́шим Иису́сом Христо́м, укрепи́ во мне́ ве́ру в Него́, утверди́ в любви́ Его́, научи́ мене́ люби́ти и сла́вити и Тебе́, Пресвяту́ю Ма́терь Бо́жию, Преблагослове́нную Мари́ю: вседержа́вному покро́ву Твоему́, Богоро́дице, вруча́ю себе́ на вся́ ве́ки. Ами́нь.
Молитвенное воззвание ко Пресвятой Богородице св. Иоанна Кронштадтского
О, Влады́чице! Да не вотще́ и всу́е мы́ нарица́ем Тебя́ Влады́чицею: яви́ и явля́й при́сно над на́ми Твое́ свято́е, живо́е, де́йственное влады́чество. Яви́, и́бо все́ мо́жеши во благо́е, я́ко Ма́ти всеблага́я всеблага́го Царя́; разгоня́й мра́к серде́ц на́ших, отража́й стре́лы лука́вых духо́в, льсти́вно на на́с дви́жимые. Ми́р Сы́на Твоего́, ми́р Тво́й да ца́рствует в сердца́х на́ших, да все́ при́сно ра́достно восклица́ем: кто́ по́сле Го́спода, я́ко Влады́чица на́ша, всеблага́я, всеблагомо́щная и пребы́страя Засту́пница на́ша? На то́ Ты́ возвели́чена, Влады́чица, на то́ оби́лие несказа́нное боже́ственной благода́ти Тебе́ дано́, на то́ неизрече́нное дерзнове́ние и си́ла у престо́ла Бо́жия и да́р всемогу́щей моли́твы даны́ Тебе́, на то́ Ты́ неизрече́нной свя́тостию и чистото́ю благоукраше́нна, на то́ Тебе́ могу́щество безприкла́дное от Го́спода дано́, что́бы Тебе́ сохраня́ти, защища́ти, заступа́ти, очища́ти и спаса́ти на́с, насле́дие Сы́на Твоего́ и Бо́га, и Твое́. Спаса́й же на́с, о, Пречи́стая, Всеблага́я, Прему́драя и Всеблагомо́щная! Ты́ бо еси́ Ма́ти Спа́са на́шего, Кото́рый из все́х име́н благоволи́л бо́лее все́х называ́тися Спаси́тель. На́м, стра́нствующим в житии́ се́м, сво́йственно па́дати, и́бо мы́ обложе́нны пло́тию многостра́стной, окружены́ духа́ми зло́бы поднебе́сными, прельща́ющими ко греху́, живе́м в ми́ре прелюбоде́йнем и гре́шнем, соблазня́ющем на гре́х; а Ты́ превы́ше вся́каго греха́, Ты́ Со́лнце пресве́тлое, Ты́ еси́ Пречи́стая, Всеблага́я и Всеблагомо́щная, Тебе́ сво́йственно очища́ти на́с, оскверне́нных греха́ми, ка́к ма́ть очища́ет дете́й свои́х, егда́ мы́ воззове́м к Тебе́ смире́нно о по́мощи, Тебе́ сво́йственно подыма́ти на́с, непреста́нно па́дающих, заступа́ти, охраня́ти и спаса́ти на́с, наве́туемых от духо́в зло́бы, и наставля́ти на́с ше́ствовати ко вся́кому пути́ спаси́тельному.